البودرة من اساسيات الميك اب وليها انواع كتير ولكل نوع استخدام ،ولكل بشرة نوع البودرة المناسب ليها كتير ميعرفوش استخدامات انواع البودرة المختلفة وازاي تختار البودرة المناسبة لبشرتها ،في المقال هشرحلك كل اللي محتاجه تعرفيه عن البودرة و متحتاريش كتير.
انواع البودرة
- البودرة السايبة (اللوس بودر): لتثبيت الميك اب وتمتص لمعان البشرة مناسبة للبشره الدهنية ،تغطيتها خفيفه منها الملونة بدرجات الاصفر او الشفاف اللي بتاخد لون البشرة ،تقدري تستخدميها بودرة إضاءة لان في مكونتها مواد عاكسة للضوء على البشرة واماكنها تحت العين على الخد ووسط الدقن،كمان ممكن تستخدميها تحت العين وقت تطبيق مكياج العين عشان تمنعي التلطيخ وبعدها تنفضها بالفرشة ويفضل في وضعك للبودرة تستخدمي فرشة كبيرة لتوزيع أفضل.
البودرة المضغوطة(كومباكت باودر): مصممة لإصلاح المكياج لانها سهلة الاستخدام و تقدري تاخديها معاكي في شنطتك ،مناسبة للبشرة الجافة لانها مش بتحتاج تحطي منها كميه كبيرة وبالتالي مش هتظهر جفاف البشرة بتتحط باسبونج وممكن تغني عن كريم الاساس.
البودرة المضيئه: بودرة خفيفه زي اللوس بودر بتدي إضاءة للوجه رقيقه بتحطيها على عظمتي الخدود ،وفي المنطقة الخارجية للعين للتوسيع وتحت عظمة الحاجب لإبراز جمال العين والحاجب ،أو على الرقبة ومنطقة الكتف لو انت رايحة سهرة تظهرهم بشكل جميل وبتيجي البودرة دي بدرجات البرونز واللؤلؤ وننصح انك تختاري الالوان المناسبة لبشرتك لان الاختيار الغلط هيديكي نتيجه سيئة جدا ، والبودرة مناسبة لجميع انواع البشرة ماعدا البشرة الدهنية بسبب لمعانها و بتستخدمي فيها الفرش لتوزيعها.
البودرة المائية: بتغنيكي عن كريم الاساس بتكون مضغوطة ومعاها سبونج مخصوصة وعن استخدامها بترطبي بشرتك بالمرطب قبلها بنص ساعة بلي الاسفنجة شوية بالمية وحطيها على البودرة ومشيها على بشرتك ارجعي اغسلي الاسفنجة بالميه واعصريها كويس ومشيها على بشرتك عشان اي زياده تشليها ،ونصيحة ابعدي عن النوع ده لان ضرره كبير على البشرة بتسد المسام ومع الوقت بتظهر خطوط وتجاعيد على البشرة.
البودرة الHD: تغطيتها كاملة وكمان ثابته لوقت طويل خصوصا لو في مكان إضاءة وحرارة عالية عشان كده بتستخدمها الفنانات ،بتكون سايبة او مضغوطة ومناسبة للبشرة الجافة.
البودرة المعدنية: أفضل أنواع البودرة بتدي لوك طبيعي للبشره وتجانس ومش مضرة للبشرة وبتحميها لان فيها مادة ثاني اكسيد التيتانيوم واللي بيعتبر عامل حماية من الشمس ويغطي تجاعيد البشرة واكسيد الزنك والماغنيسيوم اللي بيحافظ على جمال البشرة ونضارتها كمان بتداري اي عيوب للبشرة بشكل طبيعي وطبقة خفيفة منها كفاية لانها مركزة والمميز كمان انها مناسبة لجميع أنواع البشرة خصوصا الحساسة والدهنية.
الFınıshıng Powder: بتستخدم بعد البودرة السايبة عشان تداري اي خطوط وتدي شكل مخملي للبشرة لكن مش خطوة اساسية في الميك اب ومش شرط تستخدميها.
البودرة البرونزية: وهي مخصصة عشان تدي لوك برونز وتبرز بعض المناطق مش كامل الوجه وطبعا ننصح تختاري اللون المناسب ليكي .
“وفي النهاية بعد معرفة انواع البودرة ننصحك باختيار البودرة المناسبة لنوع بشرتك ونوع البودرة المخصصة لاستخدامها ومتنسيش تختاري الدرجة المناسبة ليكي وعلشان تعرفي الدرجة المناسبة ننصحك عند الشرا جربي البودرة على الرقبة او الخد مش الايد ،وكمية بسيطة من البودرة بتكون كفاية منعا للتكتل وظهور اي خطوط للبشرة “.
